Originele titel: Waerom zijt ghy soo langhen tijdt. (De Beeldenstorm, 1566)

Waerom zijt ghy soo langhen tijdt
van ons absent, och lieven Heer,
en dat u schaepkens onbevrijdt
u heete gramschap vuelen seer?

Denckt op u Catholycke kerk,
door u ghesticht en ghefondeert,
u vry verlost en eyghen werck,
daer ghy soo lang in zijt ghe-eert.

Ghedenckt toch op u oudt gheslacht,
u eyghen erfdeel en u schadt,
denckt op u Sion seer gheacht,
daer ghy u wooning hebt ghehadt.

Heft op u voet, en metter daet,
vertreet u vianden tot niet,
door wie ghecomen is het quaet,
dat u ghewijdt plaets is gheschiet.

U teghen-strijders met gheschal,
in t’ midden van u kerck seer coen,
haer vlagghen stellen over al,
te toonen wat sy dorven doen.
Men sach eertijts tot kercken bouw
men steen en houdtwerck heeft ghesneden,
soo excellent als wesen souw,
ter eeren Godts met ghoede reden.

Maer nu een deel veracht onvromen,
door boosheyt sijnde heel ontstelt,
sijn in u tempels hier ghecomen,
om daer te toonen hun ghewelt.

Daermen soo groot devotie sach,
en Godt soo loflijck was ghe-eert,
daer hij ghedient was nacht en dach,
daer sachmen menschen heel verkeert,

Met hamers, bylen en gheweer,
als vanden boosen gheest bezeeten,
het schoon ciraet, met groot on-eer,
hoe sy dat al in stucken smeeten.

De plaetsen tot Godts dienst ghewijdt,
die hebben sy in brandt ghesteken,
"wy willen", seyden sy wt spyt,
"dit altemael in stucken breken."

Sy seyden in hunne boosen moet:
"laet ons gheheel gaen destrueren,
en rooven al het kercken goet,
wy sullent noemen reformeren."

Dit hebben sy alsoo ghedaen,
soo met af breecken soo met branden,
daer erghens sy gheraeckten aen,
de templen Godts in dese landen.

En tot noch toe is geen ghewach,
noch profesy noch geen propheet
die vanden tijdt dit dueren mach,
can onsen hope doen eenich weet.

Maer salt o Heer noch langher sijn,
Dat u vyant sal ont-eeren?
is ooc oneynd-lijck den termijn,
dat sy u blijven blasphemeren?

Waerom en toont ghy niet u cracht,
te consumeeren heel te niet
elck een die uwen eer veracht,
want alles is in u ghebiet.

Och houdt u handt niet langher stil,
te straffen dese geus-ghesellen,
ghy hebt de macht, hebt oock de wil,
het sijn vyanden en rebellen.

Ghy sijt ons Coninck en ons Heer;
ghy doet de deught dat wordt ghedaen,
laet kercken-schenders nimmermeer,
onghecastijdt dus hennen gaen.

Gij doet het goede dat gebeurt.


Navolging van psalm 74: "O God! Waarom verstoot Gij in eeuwigheid?

De initialen onder de laatste strofe betekenen: "Vidit
Cornelius de Witte, Canonicus Antverpiensis et Archidiaconus".