|
<H Psalm L.>
<W Deus deorum loc.>
<W Op de Voys: Als hier nae volghet.>
<V 1> DE HEER hem machtich hooren laet
So wijt die Sonn' int Oosten gaet/
En roept de Weerelt heele/
Rondtom ten Westen deele.
Wt Zyon coemt sijn schoone Glants
Ons' Godt en wil niet swijghen
Verteerend' Dier dat is sijn Schants/
Met onweer gaet hy krijgen.
2. Hemel end' Aerd ghetuygen sijn/
Dat hy syn volck wil richten
Van sonden en des doodes pijn
All’ onval wil hy slichten/
Vergadert my mijn vroom gemeen
Die mijn verbondt meer achten
Dan alle Offerhand' met een/
Voor eyghen werck haer wachten.
3. De Hemel/ sijn gherechticheyt/
Verconden end’ hem eeren/
Voort mijn Volck mijn Waerachticheyt
Israel laet dy leeren
Om dijn Offer ist niet te doen/
Voor my syn alle daghen
Dijn Offer en dijn reuckwerck schoon -
Maer niet sy my behaghen.
4. Ick neem geen Vee wt dijnen Stal
Want all' Ghediert' op aerde/
Daertoe t' Ghevogelt overal
Is mijn met all' syn waerde.
Geen Beeste bloet noch Vleesch so goet
Is in des werelts Ronde/
Bequaem te Coelen mijnen Moet/
Als my App'tijdt bestonde.
5. Den hoochsten dijn geloffte goet/
Betael/ End' my aenroepe/
So sult ghy mijne hulpe vroet
Gaen prijsen nae dijn hope
Maer totten Boosen seyt de HEER/
Wat voert ghy huychels wijse?
In dijnen Mont mijn goede Leer?
Tot Spot/ end' niet ten Prijse.
6. Siet ghyeen Dieff ghy loopt met hein /
Gaet mee nae vreemde Wijven/
Vol voosheyt is dijns Mondes stem
Dijn Tongh gaet Valscheyt drijven
Dijns Moeders Soon aendoet ghy hoon
Als ick dijn Boet verwachte/
So meynt ghy Dwaes/ het is al schoon
Als offt ickt niet en achte.
7. Maer ick sal straffen dy wel hart
End openbaer beschamen/
Aenmerckt doch sulcx al sonder schert
Ghy Spotters alte samen/
Opdat doch gheen eeuwich Verdriet
U moet ten laetsten Vaten/
Want als ick Ruck int Ongheluck/
Dan mach gheen hulpe baten.
8. Wie dancken can die offert slecht
Dat neem ick aen ten prijse/
Daerom so leert dit Offer recht/
Het is de beste Wijse/
Daer is bereyt die Salicheyt/
Dees' wech mach niet Faelgeeren/
Des Heeren Woort is goet bescheyt
Daer in laet ons Studeeren.
|
LITURGIE
&CETERA 
