|
<H Gezang 71>
<C Een Ghebedt-liedt teghent Pausdom/ wt den LXXIX. Psalm.>
<W Op de Voys: Waer Godt niet met ons deser Tijdt.>
<V 1> HEER Jesu Christ dijn Erf wy zijn
Dijn Heylig kerck op Aerden
Want wy volghen die Stemme dijn
Om Salicheyt t' Aenvaerden
Help ons nae dijn veel Eedle Doot/
Dat wy ons moghen tsamen voort
In dy eewich verblijden.
2. Al roemt des Pauses aenhanck veel/
Dijn rechte Volck te wesen/
Doch hebben sy aen dy geen Deel
Syn gaer by dy mispresen/
Dijn heylich Volck/ die weerde Stadt/
Door Tyranny end Judas Raedt/
Sy peynsen te verpletten.
3. Dijn Woordes Dienaer Allegaer/
Willen sy grousaem slachten
En dijnes Volckes heylig schaer/
Door Raven spijse achten/
Verhoort Heer dat Onschuldich bloet
Dat in den Hemel Roepen doet/
Die honde gaent Opslicken.
4. Van Rasery ist Pausdom heet/
Ons grouwlijck te Versoopen/
End Bloedich in haer eyghen sweet/
Dijn Christenheyt te doopen
Als Water sou daer vlieten bloet/
Deer door te Coelen Kains Moet/
Niemandt soud ons begraven.
5. Eens smaey wy ons Ghevueren zijn
Een spot end schamp den vrienden/
Heer laet doch ons met dijnen grim
Gheheel end al bevinden
Maer stort dijn grim op 's Pauses staet/
Die dijn Volck lang' vervolghet haedt/
End dijn Woort gaet Blameeren.
6. Help Jesu Christ/ die saeck is dijn/
End dijnes Heylighen Name/
Om dies wil (Heere) nu verschijn/
Teghen des Vyandts Blame
Dat Bloet der salighen Schape dijn/
Laet duysend weerdich by dy zijn/
Den Cain wilt verbannen.
7. Maer wy die zijn dijn Volck bereyt
End Schapen dijner Wyde
Dancken dy (HEER) in Eewicheyt/
Dat ghy met stercken Eede/
Ons Hulp end Troost hebt toegesacht/
Daerom wy prijsen Dach end Nacht
Dijn wonder over wonder.
|
LITURGIE
&CETERA 
