|
<H Psalm. CXXXV.>
<C Laudate nomen.>
<W Op de Voys: Het syn doch Salich alle die.>
<V 1> Ghy 's Heeren knechten dient hem wel
Een yeder Looft syn Name snel/
Ghy knecht int huys des Heeren/
Ghy die dient in den Hoven reyn/
Des Tempels onses Gods alleyn/
Sulcx willich doet en geeren,
Looft hem/ want Vrendlijck is de Heer
Loofft synen Naeme altijdt meer/
Die Liefflijck is Al omme.
Israel ende Jacob siet/
Heeft hy vercooren end behoedt
Tot synen Eyghendomme.
2. Ick weet dat groot is Godt de Heer
Jae boven alle Goden Veer
Al wat Godt wil end Lustet/
Doet hy in HEmel end Aertrijck/.
Zee en Diepten Insghelijck/
De Wolcken hy Toerustet
Laets' Op gaen van der Aerden endt
Hy Blicxem maeckt/ en Reghen sendt/
Windt wt heymlijcke steeden/
Hy heeft oock met syn Macht vermoort
In Egypten all' Eerst' Gheboort
Van Menschen ende Veede.
3. Hy Wonder in Egppten deed'
Aen Pharo en syn knechten meed
Veel Volcken bracht hy omme/
Haer Coninghen van grooter macht
Hy Doode ende omme bracht/
Int Landt al om en omme
Der Amoriter Coninck fel/
Sihon end Og te Basan snel.
End oock die Coninckrijcken
In Canaan van grooter Eer/
Vernielde ende bracht ter Neer
De Heere All' ghelijcke.
4. Hy gaff haer Landt ten Erve heel
Syn Volck die kindren Israeel
Dijn Naem duert eewich Heere/
De Heer syn Volck sal Rechen fijn/
End syne knechten alle zyn
Ghenaedich Immermeere.
Der Heyden Goden syn ghebout
Al te saem van silver ende gout/
Ghemaeckt van Menschen Handen/
Sy hebben Monden/ spreken nicht
End Oogen maer gants geen gesicht
Sy blijven all te schanden.
5. Sy hebben Ooren/ hooren niet/
Gheen Azem oock tot ghener Tijdt
En is in haren Monde.
Die sulcke maecken/ syn all gaer
Als die op sulcke Hopen daer
End gaen daer meed' te gronde.
Maer Isr'els Huys end Aaroon
End Levi den Heer Loven schoon/
Syn Loff werdt hooch verheven/
Wt Zyon sy ghelooft de Heer
Die te Jerus'lem woont met Eer.
Den Heer men Loff moet geven.
|
LITURGIE
&CETERA 
