|
<H Psalm. XL.>
<W Expectans expectaui>
<W Op de Voys: Aen Watervlieten Babilon : Als volghet.>
<V 1> Den HEER verbeyde ick altijt/
Hy trock my wt den graff subijt/
Hy Neycht hem my te hooren/
Daer ick in lacht en ooren.
End wt den swaren dicken slijm/
Steld' wter Noot die Voeten mijn
Op een Steenrotz hooch seere
End' hy gheleyde mijnen Gang'
Mijn Mondt hy gaff een nieu ghesang
Te Loven Godt den HEERE.
2. Dit sullen veel sien/ end' oock nu
Godt vreesen en Betrouwen/
Wel Hem/ die synen hope Trou
Steets sett op Godt te bouwen/
Hem niet keert tot den stouten quaet/
Noch met die Leughenaers omgaet
Veel wonders Heer ghepresen
Hebt ghy ghedaen/ Wie's ws ghelijck?
Groot dyn ghedachten syn en Rijck/
Die ghy ons hebt bewesen.
3. Dat wil ick gaen Verconden fijn/
Door all' de Werelt draghen:
Te groot sy te vertellen zijn
Ghy hebt gantsch gheen Behaghen
Aen Offer en Spijsoffer Maer
Mijn Ooren opende ghy claer/
Dat ick soud hooren HEERE
Want ghy noch Offerhande goet/
Noch oock Sondoffer met Bocx bloet.
Van niemant niet begeeren.
4. Doen sprack ick: Siet/ ick coem/ van mijn
Staet in den Boeck geschreven
Te doen willich den Wille dijn/
Word' ick (mijn Godt) ghedreven
In myn Hert is dijn Wet bereyt
Te Pred'gen dijn Gherechticheyt/
In die Ghemeynte reyne.
Ick wil oock mijne lippen (siet)
Van uwen Woorde keeren niet
Dat weet ghy HEER alleyne.
5. Ick heb oock dijn Gerechticheyt
In mijn Hert niet verborghen
Spreeckt van dijn Woort en dijn waerheyt
Den Avont en den Morghen
Uwe Ghenaed en rouwe siet
Swijgh' ick in der Ghemeynten niet
Dies niet van my laet varen
Heer dijn Barmherticheyt maer laet
Dijn Trou en goetheyt wt ghenaed
My altijdt wel bewaren.
6. Want ong'luck heeft my soo omvaen/
Dat ickt niet can wt spreken/
Mijn Misdaet grijpt my oock so aen/
Dat sy 't ghesicht my breken/
Sy syn gheworden meer dan 't hayr
Op mijnen Hoofde en te swaer
Mijn Hert heeft my verlaten.
Laet u behaghen/ HEEr dat ghy
MY nu verlost/ te helpen my
Haest u/ coemt my te baten.
7. Sy moeten haer all' schamen daer/
En t' schanden worden t'samen/
Die my staen nae mijn Siel/ om haer
Te Dooden t'mijnder blamen/
Te rugghe moeten vallen sy
GHescheynt oock worden all' die my
Quaet gunnen ende quellen.
Gescheynt sy moeten worden nae
Die segghen daer van my he/ he/
Godt sal s'al neder vellen.
8. Het moeten bly en vrolick sijn/
Die alle die dy soecken/
En die dijn heyl beminnen fijn/
Oock segghen t'allen hoecken/
Hooch sy ghelooft daervoor de Heer/
Want ick ben arm/ Elendich seer/
Om Godt des HEEREN Name
Maer ghy Heer sorcht dan noch voor my
Mijn hulp die my verlost zijt ghy
Mijn Godt/ wilt haesten/ Amen.
|
LITURGIE
&CETERA 
