|
<H Psalm LXXI.>
<C In te Domine.>
<W Op de Voys: Als hier nae volghet.>
<V 1> Heer ick betrouw' alleen op dy/
Verlost mijn door Dijn goedicheyt/
Laet my
Wt Leydt/
Te schanden nimmer weerden
En sonden hier op Eerden.
Tot my doch dijne Ooren heer/
Helpt my ghevanghen Armen/
Zijt my een stercke Burg end' weer
Daer heenen ick mach vlieden/ Heer
Mijns Lijdens wilt ontfermen.
2. Ghy biedt my selfs (te helpen) an
Hoe can
Ick dat op dy verdienen/
Ghy zit myn Burcht en anders gheen
Hoecksteen
Wilt my dijn hulp verleenen.
Help my wt der Godloosen handt
Van den Tyran onrechte,
Mijn toeverlaet is dijn bystandt/
Och Heere Godt/ help t'allen kant/
Maeck sterck my dijnen Knechte:
3. Op dy heb ick ghehoopet seer/
O Heer/
Van mijnes Moeders lijve/
Daer wt ghy hebt ghetracken my
Dies bly
Dijn Loff ick roem en drijve
Een wonder ick voor veelen bin
Nochtans zijt ghy mijn sterckte
Gheeft my O Godt in mijnen sin/
Dat ick altijdt dy wel bemin/
Dijn hulp de Vyandt mercke.
4. Verwerp my in mijn Outheyt niet/
Als siet
Vergaen syn al mijn crachten/
Mijn Vyanden die syn schoon reedt
Haer Leedt
Aen my te doen met machten
Op mijne Siele slaen sy acht/
En spreken seer vermeten/
Jaecht nae en grijpt hem aen met cracht
Aen hem ghebruyckend onse macht/
Want Godt heeft hem vergeten
5. Dies Heer en zijt van my niet wijt/
Tis Tijdt/
Haest U dat ghy my helpen/
De Vyandt moet hem schamen nu
Door u/
Het syn al Jonghe welpen
All die mijn Siel so teghen sijn/
Met schand' sult ghy se decken/
Die drongluck soecken al van mijn/
Laet comen haer eyghen Fenyn
Op Haerselfs hals en necken.
6. Want Heer ick wacht alleen op dy/
Help my
Dat uwen naem ick prijse/
Mijn Mondt steets u gherechticheyt
Verbreydt/
Bekenn'/ en sulcx bewijse/
Dijn heyl ick niet te tellen weet/
Dijn Macht wil ick verconden/
Voor my is dijn rechtveerdicheyt
Daer op mijn hoop staet wel bereyt
Op dy werp ick mijn sonden.
7. Gy hebt my (God) van joncks geleert
Op d' Eerdt
Dijn wonder te verconden/
Woont my oock in mijn Oudtheyt by/
Gantsch bly
Sal ick dan t'allen stonden
Kints kindt/ en haer naecomers noch
Doen condt dijn Macht end eere.
Godt dijn gherechticheyt is hooch/
Ghy groote dinghen doet/ wie doch
Is dijns ghelijck O HEERE
8. Godt ghy die my laet ancxten veel
Sien heel
Met Cruys ghy my Pobeeren/
My Bystandt doet/ end voert my weer
Rasch seer/
Door alle Ongluck Heere/
Hoe diep ick inder Aerden sy/
Noch gheeft ghy my dat Leven
Gheen Menschen hulp helpt sonder dy/
Ick wacht op dy alleen/ wilt my
Heer die Victory gheven.
9. Al ligg' ick schoon in lijden groot
En Noot/
Noch troost ghy my Heer weder/
Ghy maeckt my groot seer wonderbaer
Gantsch gaer .
Druckt ghy mijn vyandt weder/
Dies danck ick dy O Godt/ en sal
Dy opten Psalter spelen
Die Trouw' die in mijn Noot en val/
Dijn goetheyt my bewese sal/
Ghy heyl'gher Israhelen.
10. Mijn lippen singhen vrolijck nu/
Ghetrouw/
Verlost is wel mijn Siele/
Want ghy al wt ghenaden (siet)
Om niet.
Mijn Siel verlost hebt heele.
Van dijn rechtveerdicheyt voorwaer/
Mijn tongh gaet daeglijcx dichten/
Het moeten Jong' end Oudt Allgaer/
Terugghe gaen/ end schamen haer/
Die myn onglucke stichten.
|
LITURGIE
&CETERA 
