|
<H Psalm LXXXIX.>
<C Misericordia>
<W Op de Voys: Het is dat Heyl ons comen her.>
<V 1> Des Heeren goetheyt eewichlijck/
Ick singh' wt herten gronde /
End syn waerheyt ghestadighlijck/
Vercond' met mijnen Monde/
En segg' een eeuwig gnaed' opgaet
End' ghy sult in des Hemels staet/
Dijn waerheyt trouwlyck houden.
2. Een vast verbondt heb ick ghesticht
Met mijnen wtvercoren/
Den David mijnen vromen knecht/
Hebb' ick een Eedt ghesworen
Verleenen dy een Eeuwich Zaet/
End' dijnen Stoel voor allequaet/
Wil ick altydt Behouwen.
3. Die Hemel prijsen sonder Faut/
Dijn wonder (Heer) so reyne/
End dyne waerheyt Onbenaut/
In dijn Heyligh ghemeyne.
Wie mach den Heere syn ghelijcks
In wolcken end' opt heel aertrijck/
Onder der Goden kinder.
4. Godt is heerlick van groote macht
In die versaem der vromen/
End wonderbaerlijck hooch gheacht
Boven die syn rondtomme/
Heer Zebaoth wie is ghelijck
Als ghy/ een Machtich Godt heerlück?
Dijn waerheyt om end' omme.
5. Ghy Heerst over de Zee verwoet/
End' stillet syne Baren/
Egypten sloeghet ghy te doot/
Dijn sterckheyt ginckt niet sparen/
Den Hemel end die aerd' is dijn/
De Werelt onderhoudt ghy fijn/
End' al wat is daerinne.
6 Die tijden sijn in dijn bescherm/
Dijn naem is s' Lands ghenoege/
Want ghy hebt een almachtich arm/
Dijn Rechte handt is hooghe/
Gherechticheyt end' rechte Leer/
Dat is dijn Stoel een vast gheweer/
Sy moghen niet Faelgieren.
7. Genaed' end waerheyt sijn all' beyd
Voor dijnen Aenghesichte/
Hoe salich is dat Volck bereydt/
Dat Juychet in dijn Stichte.
Want (Heer) sy wandlen alte saem
Int Licht dijns Aensichts/ end' dijn Naem
Daeglijcks sy vrolijck prijsen.
8. Heerlijck in dijn Gherechticheyt
Sijn sy/ wamt ghy gaet stercken/
End wilt na dijne Goedicheyt/
Door ons so Roemlijck wercken/
Want onse Schilt dat is de Heer/
Ons Coninck end' een goet gheweer/
Die Heyligh Israel is.
9. Waerachtich hebt ghy Toe geseyt
Dijn heyl'ghen end' Beminden/
Ick heb den rechten helt bereyt
By hem is hulp te vinden/
Hooch wt den Volck is een vercoorn/
Dien heb ick mijnen Eedt gheswoorn,
Mijn knecht David ghevonden.
10. Met Heyl'gen Oly heb ick bly
Hem g'salfft tot wonder wercken/
Mijn handt sal hem behouden vry/
End mijn Arm sal hem stercken.
Die Vyanden hen sullen nicht/
Noch all dat ongherechte sticht/
Verwinnen noch vernielen.
11. Verslaen wil ick al zijn Party/
Sijn haeters wil ick Plaghen
Mijn waerheyt end ghenade bly/
Sal by hem oudt Behaghen/
End syn hoorn sal in mijnen naem
Verheven sijn met goede Faem/
End' overal ghepresen.
12 Sijn Rechte hant sal heyrschen vroe/
Int Meer end' groote water/
Hy sal my noemen oock alsoe/
Ghy zijt mijn Rechte Vader
Mijn Godt mijn Troost/ mijn hulpe schoon
End' ick wil heten eerste Soon
Hooch over al gaen maeckcn.
13. Eewich so blijft hem mijn genaed'
End' mijn Verbondt sal dueren/
So lang als duert des Hemels staet
Sijn Ryck wil ick volvueren.
Maer so syn Kinder mijne Wet
Verlaten end niet wandlen net
In mijnen Rechten reyne.
14. Ontheyl'gen sy wat ick haer sticht
Versmaeden mijn gheboden/
So wil ick oock nae myn ghericht
Castijen se met roeden/
Wel plaghen wil ick haer misdaet/
Maer nochtans wil ick mijn ghenaed
Van Haer niet heelicx Weynden.
15. Niet wil ick brecken mijn verbondt
Noch oock dat selff verkeeren
Wat is ghegaen wt mijnen Mont/
Ick heb eenmael gaen sweeren
By mijner eyghen heylicheet
Ick wil den David lieghen niet/
Syn Zaedt sal eewich blijven.
16. Syn stoel als Son end' Maen voor my
Sal eewich syn behouwen/
Ghelijck de Regenboghe vry
In wolcken is t'aenschouwen.
Maer nu Verwerpt ghy end verstoot
Den G'salffden dijn in Thoorne groot
'T verbondt met dynen knechte.
17. Syn Croone ghy ter aerden treet
Verscheurt all' syne mueren
Syn Vesten ghy al heel verplet/
Een rooff is hy met treuren,
'T beschimpen hem van allen kant/
Want ghy verhoocht des vyants handt
Verblijdt all' syn bestrijders.
18 Victory mach hy vechten niet/
Gheen hulp mach hem oorboren
Syn reynicheyt leyt int verdiet/
Tis met syn stoel verlooren
Syns Jonghen levens beste fort/
Die hebt ghy thoornich affgecort/
Bedeckt hem met veel smade.
19. Och Heer hoe lang wilt ghy noch gaen
Ons arme sondaers haten:
Dijn grim noch als een Vuyr Voogtaen
Verderfflick branden laten
Bedenckt myns levens kleyne Tal/
Waerom wilt ghy de Menschen al
Doch maken so te niete?
20. Waer is yemant die levet hier/
End' hy den Doot niet smaecke?
Mach hy syn Siel bevrijen hier
Dat hem de hell' niet raecke
Heer waer is nu dijn gnade vroet/
Die ghy beswoert den David goet/
In dyner waerheyt trouwe.
21. Gedenct Heer hoe dijn knechten goet
Versmaetheyt lijden moeten/
End' ick draecht al in mynen schoot/
Van Volcken kleyn en grooten/
Want wat dijn knechten Wort ghedaen
Dat gaet dy Heer al selvest aen/
Het is dijns Naemens saecke.
22. Die Vyand Heer versmaden dy
Als sy gaen ons verfoeyen/
Sy treden oock met voeten vry/
End meynen wt te Roepen/
Dien ghy ghesalvet hebt o Heer
Tot onsen heyl en dijne eer/
Heer Eewich zijt ghelovet.
|
LITURGIE
&CETERA 
